Президент Жолдауындағы басты үн
Дәстүрге айналған Мемлекет Басшысы Қасым-Жомарт Кемелұлы Тоқаевтың Қазақстан халыққа жыл сайынғы Жолдауы биылғы жылдың 8 қыркүйегінде жарияланды.
Президентіміз ел дамуының негізгі бағыттарын айқындап, алдымызға жаңа міндеттер қойды.
Әсіресе, Жолдаудағы бесінші басымдық – тұрғын үй-коммуналдық шаруашылығы мен су инфрақұрылымын жаңғырту мәселесі – біздің ауданымыз үшін ерекше маңызды. Өйткені су – тіршіліктің ғана емес, әлеуметтік тұрақтылық пен экономикалық дамудың да кепілі.
Президентіміздің: «Су мәселесін шешу – әлеуметтік тұрақтылықты сақтап, экономиканы дамытудың кепілі. Бұл – ұлттық қауіпсіздікті қамтамасыз ететін басты фактордың бірі» деген сөзі осының айқын дәлелі.
Су тапшылығы – ортақ жауапкершілік
Ауданымыз биылғы жылы да су тапшылығын қатты сезінді. Егіс алқаптары мен жайылымдарда, ауыл-аймақтарда, тіпті тұрмыстағы қарапайым тұтынуда да қиындықтар туындады. Дегенмен, су азайған сайын оны үнемдеудің орнына бей-берекет жұмсау көріністері жиі байқалды.
Кейбір диқандар алдын ала ескертілгеніне қарамастан суды көп қажет ететін дақылдар егуді тоқтатар емес. Тіпті Президент атап өткендей: «Су тапшылығына байланысты қиындық болуы мүмкін екені алдын ала ескертіліп жатады. Соған қарамастан диқандар суды көп қажет ететін дақыл егуді азайтар емес. Тіпті егін суаруға қажетті суды еш рұқсатсыз, шартсыз бұрып алатын жайттар жиі кездеседі» деген сөзі бекер айтылмаған.
Бұл жағдай біздің ауданымызда да кездесіп отыр. Заңсыз ағын су пайдаланушылар, өз пайдасын ғана ойлағандардың әрекеті көпке зиянын тигізуде. Таулы өңір болғандықтан, жаз айларында демалыс орындарында су тұтыну көлемі еселене түседі. Кейбір жекелеген азаматтар демалыс аймақтарында бассейндерді толтыру үшін суды шектен тыс пайдаланып келеді. Бұған қоса, жеке тұрғын үйлердің иелері де ауыз суды ысыраппен қолдануда.
Ысырапқа жол жоқ
Су – таусылмайтын ресурс емес. Президентіміздің: «Біз қазірдің өзінде судың тапшылығын сезініп отырмыз. Ал оны тұтыну мәдениеті төмен» деген сөзі бәрімізге үлкен ой салады. Сондықтан әрбір тұрғын суды үнемді пайдалану мәдениетін қалыптастыруы қажет.
Аудандық деңгейде бізге мынадай міндеттерді жүйелі түрде қолға алу қажет:
— Су құбырлары мен каналдарды жөндеу және қайта жаңғырту жұмыстарын жеделдету;
— Диқандарға су үнемдейтін жаңа технологияларды (тамшылатып, жаңбырлатып суару) енгізуді қолдау;
— Суармалы жерді пайдалануда қатаң бақылау орнатып, заңсыз су бұру әрекеттеріне тосқауыл қою;
— Шаруалар арасында суды тиімді пайдалану жөнінде тұрақты түсіндіру жұмыстарын жүргізу;
— Жергілікті тұрғындар мен кәсіпкерлерді ауыз суды ұқыпты пайдаланып, ысырапқа жол бермеуге үндеу;
— Мектептер мен жастар ұйымдарында су ресурстарын сақтау мәдениетін тәрбиелеу.
Әр тамшы – болашақтың аманаты.
Құрметті ағайын!
Су – табиғаттың бізге берген ең қымбат қазынасы. Оны ысырап ету – болашақты ысырап ету деген сөз. Сондықтан баршамызды ел Президенті атап көрсеткен басымдықтарға үн қосып, су ресурстарын үнемдеуге, ұқыпты пайдалануға шақырамын.
Ауданымыздың өркендеуі, халқымыздың әл-ауқаты – осы ортақ жауапкершілікті сезінгенімізде ғана жүзеге асады.
Ендеше, әрбір тамшыны бағалайық, суды сақтайық, болашаққа аманаттайық!

Құрметпен,
Н.Қойбағаров,
Төлеби аудандық мәслихаттың төрағасы.